難交代

日日返工追趕報表

處理急件、部門之間既無理要求

依家越來越感覺到〝人情味何在〞？

這間公司就算係好高職位既人都好啦

講過既說話都係可以唔認數

仲有工作只會分配畀一啲無牙力既部門

我哋部門就由年頭做到年尾都無時停

仲越嚟越多嘢做添

搞到累積既工作無法解決

就連果位話批兼職畀我哋而又唔簽出文件既財爺

佢係幾日前竟然仲出聲話我哋放太多嘢係走廊

其實所謂走廊都係屬於我哋部門既地方

仲有呀！唔放係果度難度放係我張枱嗎？

其實我已經放埋我後面無人坐既枱面及枱底啦

仲有噚日又同主任嘈嚟

對這份工作真的越來越無心機

再加上我今次出院之後

記憶、集中、精神這幾方面都差了很多

導致工作的速度都慢了很多

雖然見伍醫生時都有提及

醫生話要畀時間自己及身體復原

依家最緊要係放鬆及控制情緒

毛病上既事可以交畀醫生幫我

但係情緒及壓力上就一定要我自己控制

這方面我當然知道

可惜講到這方面控制既能力就等同低能無分別

出院返工之後慢慢發現自己開始記唔到某些程序

平時用開既密碼都久不久記不起

密碼可以剛剛開完不出10分鐘想再入已……？？

因此其他工作上的程序就更加容易出阻礙

這些問題醫生知道後

說要畀時間自己及大腦慢慢將記憶重新組織

自己又要放鬆心情等大腦鬆弛休息

平時都要畀自己及心身有足夠既休息及睡眠

因此醫生先至想我去見劉醫生幫我

不過就唔知道我同劉醫生發生咩事

而導致我對劉醫生有咁大既反感唔想去覆診

都係遲下再講啦

追時間！

今個月既月結仲未完成

離完成還有很遠

其實品牌經理已經開聲追佢哋

而我經理就仲未出聲

不過我知道經理係驚我又畀壓力自己

因為月初醫生開假畀我係屋企休息多一星期

我就只係休息咗星期日

星期一就已經正常返工

講真頭個星期我身體真係好攰好辛苦

只係唔好意思再放假

不過依家身體既感覺比起出院時更加攰

可能係太攰既原因搞到夜晚更加瞓唔到

每晚只係瞓得2-3.5小時

夜夜係咁樣真係攰到好想搵晚一睡不起

有可能係我驚聽日返去覆診既原故

搞到個人成身都覺得好痛

今晚會打電話同阿姨傾下

聽下佢既意見

睇下佢想唔想我出席啦

因為阿姨平時好少機會見我

所以佢應該都係想藉機同我聚下

而且又可以搵我幫手記下放置朋友石碑既位置

如果佢近我爸爸就更加易記

如果唔係有幾座都幾難記架

我次次去到都記錯爸爸果座架

聽日朋友灑灰果度都會有幾十位醫護人士出席

因為係幫朋友搞殯儀既機構安排參觀架

不過佢哋都有詢問過我哋成班朋友既意見先至答應

其實我出席完再搭的士去醫院覆診應該時間剛剛好

只係有人出席參觀

唔知道會唔會就係咁樣影響進度

朋友果度10點進行儀式

機構回覆儀式需用30分鐘

而我就覆診11點15分

不過要早15分鐘到量血壓及磅重

但係量血壓前最少要休息15分鐘

如果唔係好多時都會好高

唉……點解個個長輩既殯儀我都唔可以出席架？

好驚嚇既預告

星期二C小姐返工之後

個人好似變晒咁樣

之前我哋一齊食飯

但係這兩日佢一到食晏時間佢就自己走咗去

死黨見咁樣就話陪我落去買嘢返上嚟食

當然係唔需要

只係我覺得奇怪點解

C小姐病完返嚟之後對我就好似反咗面咁

不過無所謂同唔同我食飯我一點都唔介意

只係我唔鍾意啲人係無原因之下特變

人心真係好可怕

由細到大最驚既嘢都不離兩樣『人及專業人士』

人『零歲至離世』

專業人士『醫護、電腦、量地(無工作既人士)』

唉…講番一啲好煩既事

姑娘打電話嚟通知『麻煩覆診果日要準時』

因為陳醫生要見我

果日陳醫生應該準備好時間落嚟見完我就走

又係選擇性果類覆診

咁樣講法遲少少都好麻煩囉

但係有時真係好難計時間

不過佢應該都唔會咁早落嚟

佢應該都係收到姑娘通知話我到咗佢先至落嚟啫

其實咁樣安排咪仲好

唔駛搞到我咁擔心果日會唔會遲到

死火啦！唔通電腦掃描有唔好既消息？

所以先至搞到要由佢跟進番？

又係一個好驚既預告

聽完個電話搞到依家個心都仲未定落嚟

下次再有咁樣既事可唔可以唔好咁樣呀

最多我到咗佢哋先至通知陳醫生落嚟咪得囉

咁樣又唔會阻到陳醫生做嘢

又唔駛搞到我依家咁樣要驚幾日啦

救命呀！點解次次都要咁樣整估我喎

真假病假

連續兩日經理都放大假

係6點43分既時候經理就Whatsapp我

問我今日係兩個人定係三個人返工

點解經理咁樣問？

好簡單就係經理好擔心C小姐佢今日都唔返

其實9月及10月嚟講C小姐每個月都係返得半個月工

而其它月份已經無謂講啦

上個月尾連這個月頭我入院都係請5日假

但係C小姐已經請咗11日假

經理覺得有時C小姐請假既原因好有問題

上週五話肚瀉不適請假

到噚日佢都係話肚瀉不適請假

其實係任何醫生嚟講『連續肚瀉多過兩日』

都會叫病人入院

因為要吊補充劑

我試過嘔一日咋

已經搞到身體既『甲』低要飲補充劑及吊水

唉…不過我都覺得C小姐請病假越嚟越離譜

不過我唔會畀任何意見

而且我更加唔會講任何嘢

只係我開始留意到C小姐原來同之前佢同我講既人格

開始有些出入

越嚟越覺得公司內係無任何值得信任既人

這間公司越嚟越似地獄

電腦掃描

噚日因為去長洲行了大半天

直到晚上5點幾回到家中身體已很累

難為了媽媽還要為我們煮晚飯

當7點幾在廳中瞓醒後

媽媽很緊張地叫我吃飯

因為她怕我走進房間上床睡了便不起床吃晚飯

當我在廳我座椅上起來已感到雙腳很痛

導致行起路上來很不穩定好像就來跌倒一樣

好在今早瞓醒發覺已經沒有昨晚那麼痛

而媽媽還很擔心我今天要返去伊院做電腦掃描檢查

當我找到地方後便換上紫色一件頭衫

今次我拿了件藍色褸著『件紫色衫薄』

聽名要去姑娘那裡打豆豆『插導管』及量血壓

之後又要再等叫名正確做檢查

很多人做完檢查等10分鐘便可去拔豆豆

但我就要等30分鐘先至可以去拔豆豆仲要量血壓

我問點解時『姑娘話我有哮喘』

當場我眼都登大咗『幾時變咗有哮喘架？？』

講番做檢查時打顯影劑時『有幾條熱氣沖入個身』

做完檢查唔知道係食完平時既藥影響

還是顯影劑影響下『頭暈兩邊企唔定』

好在去拔豆豆時姑娘無發現

而最後血姑發現扶我埋位坐時

佢話真係感到不適不定要出聲喎

我當然係唔理佢

休息下覺得行得好啲就慢慢行唔想畀人發覺

這樣即刻成機走人啦

唉…最後當然係走得好辛苦先至去到巴士站

其實我好驚話畀醫護聽我感到不適時

佢哋一定會好緊張

因為經過果兩次檢查及打止痛針影響下而入ICU

醫院已經將我列入黑名單啦

因此今次幾位姑娘都好小心咁樣處理我既插豆豆

而且打顯影劑時那位醫護都留在側邊觀察了一會

之前我做過這類型檢查

通常醫護接駁針筒後便離去

以免受到影響

現在只等週五回去見醫生再睇報告及覆診

好怪既感覺

好快就週六

所有同事都好開心

因為又可以連放兩日假

C小姐由10月12日至10月20日

都只係返得1日工返

因為佢又請病假由16號至18號

日日請假既原因都唔同

不過我已經開始唔信佢真係假啦

因為由今年4月至10月

佢已經請咗20幾日大假啦

仲犀利過我入兩次醫院既假期

經理應該係好唔滿意

不過佢又無佢符喎

我週一早上又要請假返QEH做電腦掃描

週日晚9點30分要食8粒藥

週一早7點30分又要食餘下8粒藥

藥袋寫明係『類固醇』

搞到我好唔想食

咁樣我一早一晚加埋每餐要食十幾粒藥

諗下都想嘔

做完這個檢查就要等週五果日返去覆診

其實我依家已經開始好驚啦

這幾天發現自己好多問題出現

我咁樣講當然唔會係好事

近期睇嘢有時會突然眼定定

真係定到自己想郁都唔得

個腦又突然會覺得好似一部分既地方抽空咗

隻手就更加有問題啦

手指痺到用筷子及筆都發唔到力

對上既手臂就有時唔知道係唔係攰定係咩事

會突然間好麻痺孫痛

食完藥出現果種虛浮仲係時好時壞

唔知道有無其他好方法處理到？

定係今次開藥量過強導致？

不過食完這隻藥我隻手又真係唔痛啦

好啦！今日個頭唔知做咩下晏開始有啲怪怪既不適

但係果種不適我唔識得點樣用文字表達

願伯有一路好走

噚晚聽到阿姐既奶奶已離開

伯有佢已經辛苦咗幾年

雖然我係好想見佢最後一面

不過佢離開既時候我都唔知道

而且伯有佢入醫院既時間同我入醫院既時間差不多

就連一次都無去過醫院探佢

不過就算我知道大家都唔會鍾意我去探

就連伯有佢都覺得我身體既抵抗力差

唔想我去病房這類地方

由知道伯有離開果刻開始

我一諗起伯有就忍唔住流眼淚

仲一流就流到收唔到添

今日下晏要返眼科醫院覆診

未見醫生前坐係診症室出面等緊果刻

突然又想起伯有………又開始流眼淚啦

到叫我個名入124號房見醫生時

醫生同助護都發覺我喊過

從表情睇得出佢哋覺得好奇及驚慌

唔知道今次自己又要幾耐時間先至可以正常番

希望唔需要好耐時間啦

因為我無咁多時間畀我去慢慢回復

如果情緒未平復又要見陳醫生既話

我諗我一定畀佢睇得出我既情緒失控

咁樣佢就會番查我有無準時去見劉醫生

因為由上次覆診開始我已經無再去見劉醫生啦

通知這情況陳醫生又會要我返去約見劉醫生

等劉醫生幫我解決情緒及失眠上既問題

最後希望伯有佢一路好走………

體力越來越差

這幾天假期

週六朋友怕我悶在家中便約我到她家中玩

上午一早去飲茶伯有請客『朋友說不要與她爭，因伯有有錢無地方用』

飲完茶伯有去做按摩

我與朋友去行街及買餸『朋友下廚煮兩味我嘆』

當下午時我坐在朋友家中攰到〝中眼瞓〞

朋友看見便叫我上床瞓

我當然不好意思及不想啦

難得去朋友家中無可能浪費時間去睡覺

最後朋友見我不上床瞓便叫我去商場行下街

當我們行到6點鐘時伯有便來電找我們

今晚朋友用了1個點鐘煮了一餸一湯

朋友煮嘢食既能力越嚟越力

以前我哋係一齊玩煮飯仔架

依家佢力我咁多我都唔敢再係佢面前出手囉

伯有每次食完晚飯都會叫朋友仔早些送我去搭車返屋企架

伯有好驚我太夜返屋企唔好

其實我無諗過今日去朋友屋企都會去到咁攰架

搞到朋友成日都覺得對我唔住咁樣

其實唔關佢事

只係我自己不自量力啫

週日同家人去探爸爸

每次這些日子我都會覺得特別辛苦

因為周圍都係點香燒元寶等

導致我的氣管呼吸很困難

今次因為幫弟弟拿著香給他燃點時

我一時吸了太多香味『咳到氣喘，最後要用舒緩劑』

太熱太焗既日子越來越難頂

但係我既氣管就同氣候一樣越來越差先至慘

身心都越嚟越攰

雖然醫生開假紙開到10月12日畀我

可惜工作實在太多啦

真係唔敢好似醫生咁講放假係屋企適應啲新藥

點解我會話要係屋企適應新藥？

係因為林醫生去詢問陳醫生既意見之下

陳醫生開咗一些新既止痛藥畀我食

但係果啲止痛藥食完之後有一段時間內

我會感覺到好虛浮『又唔算暈』

望嘢好唔實在好虛浮感覺不適

起初唔習慣時

吃完藥望得嘢多會覺得想嘔及暈眩

這感覺令到我好難受及不適

因此林醫生先至會開多一星期假畀我慢慢適應啲藥

當然我無聽話

一出院第二日就返工

係公司都唔敢周圍走

好驚唔適應不適會暈倒

咁樣就大件事啦

當然麻煩同事送我入院一回事

而係出院無耐再度入院

院方一定會搵番同一醫生跟進我既問題

而且可能會連累林醫生畀人話

這幾天返工真係攰到我每晚返到屋企都唔想食

失眠得嚟又好攰

坐係廳度就想瞓

返上床就即刻開眼瞓唔著呀

唉…可能我真係要失眠到死

週三QEH既姑娘打電話畀我

問我近期既吞嚥問題如何

想我去油麻地見一見語言治療師

不過我推咗佢

話我工作上已經好忙

而且覆診又越來越密集

搞到我依家好多時都未必記得所有覆診既日期時間

因此我真係唔想再搞多一樣嚟煩

最後佢就無我辦法

只好話如果我覺得嚴重咗或有需要

可以打電話去油麻地預約見治療師

出院後既忙碌

差不多兩個禮拜無寫卜啦

當然就連巡卜既時間都無啦

上個月27日本嚟係返醫院覆診

點知道又出事搞到入咗醫院

唉……其實我依家對入醫院既感覺開始冷淡

無以前既感覺咁大咁想唔開

其實係好事定係壞事？

因為咁樣既感覺對我嚟講可以話係放棄

無錯係對咩都想放棄無心機去理佢

今次入院比上次既心情好番好多

因為遇到一班好好既醫護人員及醫生

其實這位林醫生我已經是第二次做我主診醫生

從來未試過有醫生會從遇再做番主診架

不過見這位醫生就係第三次啦

第一次佢係我另一位病友『現已成朋友』既主診醫生

第二次佢就係我既主診醫生

不過果次一開始就畀個姑娘搞到我好唔開心

所以導致我果次對任何既醫護人員都無咩好感

今次就係第三次啦

這次林醫生每次見我既時候都好有心機及笑容

唔知道係唔係佢見我次次見佢都要攞部電話出嚟睇番自己有咩問題要問佢

當然咁樣我起初覺得好尷尬

但係唔係咁樣又唔得喎

因為唔係咁樣就連一條問題都唔記得想問咩

可能就係咁樣林醫生對我特別容忍

手痛問題林醫生聽完我講係神經線痛既問題

佢就特別攞我既病歷去問陳醫生

依家陳醫生開咗隻止痛藥畀我食

依家好少會痛

不過全部藥都要調配過

新既藥食完令我覺得有虛浮感

因此林醫生寫病假紙寫多一週給我在家慢慢適應下

不過我今個星期一已經好唔聽話咁樣返咗工啦

21號又要做電腦掃描

25號又要返去覆診

真係搞到無咩時間

工作量又大增喎